༄༅། ། ན་མོ་གུ་རུ།

བརྗོད་པར་དཀའ་བའི་མཚན་མཆོག་ནི། །

འཇམ་དབྱངས་མཁྱེན་བརྩེའི་དབང་པོ་ཞེས། །

ལྷ་དང་བཅས་པའི་འཇིག་རྟེན་ན། ། 

སྙན་པའི་གྲགས་པ་རབ་གསལ་བ། །

གང་གི་ཞབས་ཀྱི་པདྨོ་ལ། །

དེ་དག་གཙུག་གི་ནོར་བུས་བཏུད། །

ཡོངས་རྫོགས་བསྟན་པའི་མངའ་བདག་སྟེ། །

སྐྱེ་རྒུ་ཡོངས་ཀྱི་སྐྱབས་གཅིག་པུ། །

འབྲེལ་ཚད་དོན་ལྡན་ཕྲིན་ལས་ཅན། །

མི་སྲིད་སྲིད་པའི་ཆོས་དེ་རྨད། །

འདིར་སྣང་གཟི་བརྗིད་སྙན་གྲགས་ཀྱིས། ། བྱིས་པའི་བློ་ལ་ངོ་མཚར་སྐྱེ། །

དེ་དག་དམ་པའི་རྣམ་ཐར་མིན། །

ས་སོགས་འབྱུང་བཞི་མཐུ་ཆེ་ཡང་། ། ཀུན་ཁྱབ་ནམ་མཁའ་མཚུངས་མིན་ལྟར། །

གངས་ཅན་བསྟན་འཛིན་སུ་དང་ཡང། ། ཐུན་མིན་རྣམ་ཐར་རྨད་ཀྱི་ཕུལ། །

རྒྱ་[399]མཚོའི་འཇིང་ལས་བྱིས་བློ་ཡི། ། སྐྲ་རྩེས་གཞལ་གྱིས་ག་ལ་ལོངས། །

ཐོབ་འཇལ་རིག་པ་ནོར་སོགས་ཀྱི། ། དབང་དུ་གྱུར་མིན་སྐྱེས་སྦྱངས་ལས། །

བོད་ཡུལ་རྒྱལ་བའི་རིང་ལུགས་པ། ། ཀུན་གྱི་ཚོགས་རྗེར་གྱུར་པ་ཡི། །

ཚུལ་འདི་ཁོ་ནས་འཇིག་རྟེན་འདིར། ། ཐུབ་དབང་གཉིས་པའི་རྣམ་ཐར་འཛིན། །

བཤད་རྒྱུན་འདེགས་པའི་ཀ་ཆེན་བཅུ༑ ། སྒྲུབ་བརྒྱུད་ཤིང་རྟ་ཆེ་བརྒྱད་ཀྱི། །

གཞུང་ལུགས་སྨིན་གྲོལ་གདམས་པའི་བཅུད། ། གངས་ཅན་ལྗོངས་སུ་བཞུགས་སོ་འཚལ། །

གསན་བསམ་སྒོམ་པས་མཐར་ཕྱིན་མཛད༑ །

སྐྱེ་བ་མེད་ལས་སྐྱེ་ཚུལ་དང་། ། འཕོ་བ་མེད་ལས་འཕོ་ཚུལ་བཞིན། །

སྤངས་རྟོགས་ཀུན་གྱི་མཐར་སོན་ཀྱང་། ། གདུལ་བྱ་ཐབས་ཀྱིས་འདུལ་བར་བསྟན། །

སྔ་[400]འགྱུར་ཡོ་ག་རྣམ་གསུམ་གྱི། ། རྒྱུད་དང་སྒྲུབ་སྡེ་བཀའ་གཏེར་སྲོལ། །

ཕ་ནོར་བཞིན་དུ་བདག་གིར་བཞེས། ། སྨིན་གྲོལ་ཆུ་སྲོལ་ཁྱབ་པར་བཙུགས། །

ཁྱད་པར་ཐུགས་བསྐྱེད་ལས་འཕྲོ་དང་། ། གདུལ་བྱ་དུས་བབས་ཌཱ་ཀི་ནཱིའི། །

ལུང་བཞིན་རྡོ་རྗེའི་རྒྱ་བཀྲོལ་ནས། ། རིན་ཆེན་ས་དང་དགོངས་པའི་གཏེར། །

དག་སྣང་ཤར་དང་སྙན་དུ་བརྒྱུད། ། སྔོན་གནས་རྗེས་དྲན་གོང་མ་ཡི། །

ཡང་གཏེར་ཟབ་ཆོས་ནོར་བུའི་མཛོད། ། སྔོན་ཆད་ས་སྟེང་མ་གྲགས་པ། །

སྐལ་ལྡན་དཔྱིད་དུ་དབྱེ་མཛད་པ། ། བསྟན་རྩ་གསང་ཆེན་རྙིང་མ་པའི། །

རིག་འཛིན་ཡོངས་ཀྱི་འཁོར་ལོས་སྒྱུར། །

མུས་ཆེན་འཁོར་ལོ་སྡོམ་པ་དང་། ། རྒྱལ་ཚབ་སེམས་དཔའ་ཆེན་པོ་ཟུང་། །

དངོས་སྣང་མཁན་ཆེན་རྡོ་རྗེ་འཆང་། ། ཐར་རྩེ་མཆེད་ཀྱིས་གསང་གསུམ་གྱི། །

རྒྱལ་ཚབ་ཆེན་པོར་དབང་བསྐུར་ཏེ། ། རྩ་བ་གོང་མའི་གསུང་རབ་དང་། །

ཡན་ལག་ངོར་ཆེན་གངས་དཀར་བ། ། ཚར་ཆེན་ཡབ་སྲས་གཞུང་ལུགས་དང་། །

གདམས་ངག་ཀུན་ལ་རང་བྱན་ཆུབ། ། ལྷ་དང་བླ་མས་རྗེས་སུ་བཟུང་། །

གདུལ་བྱ་མཁའ་སྤྱོད་གནས་སུ་བཀོད། ། བསྟན་ལ་ཕྱག་རྗེས་རླབས་ཆེན་མཛད། །

བསྟན་པའི་རྒྱན་གཅིག་ས་སྐྱ་པའི། ། བླ་མ་འགྲན་པའི་ཟླ་དང་བྲལ། །

དྭགས་པོ་སྤྱན་སྔ་ཀརྨ་པ། ། འབྲི་སྟག་འབྲུག་པ་ལ་སོགས་པའི། །

གདམས་ངག་བདུད་རྩིའི་བཅུད་གསོལ་[401]ཏེ། །བྱིན་རླབས་དོན་གྱི་བརྒྱུད་པ་ཐོབ། །

རྡོ་རྗེ་ཡེ་ཤེས་དབང་བསྐུར་བརྙེས། ། ཞེན་ལོག་སྒོམ་ཀྱི་རྐང་པ་ཚུགས། །

མོས་གུས་སྒོམ་གྱི་མགོ་བོ་སྐྱེས། ། དྲན་པའི་བྱ་ར་སྙིང་རྗེ་ཡི། །

ཕྲིན་ལས་བག་ཡོད་གོ་ཆ་མཁྲེགས། ། ཐབས་ལམ་ཆོས་བཞིའི་དྲོད་རྟགས་ཐོབ། །

རྡོ་རྗེ་ལུས་ཀྱི་གནས་ལུགས་གཟིགས། ། གྲོལ་ལམ་ཕྱག་རྒྱ་ཆེན་པོར་རྟོགས། །

སྣང་སྲིད་ཆོས་སྐུ་རྗེན་པར་ཤར། ། མཉམ་གཞག་རྗེས་ཐོབ་ས་མཚམས་ཞིབ། །

སེམས་དང་སྣང་བ་གཅིག་ཏུ་འདྲེས། ། ཡེངས་དང་མ་ཡེངས་རྣམ་དབྱེ་བྲལ། །

བདེན་གཉིས་བླང་དོར་མི་མངའ་བའི། ། རོ་གཅིག་རྣལ་འབྱོར་རྩལ་རྫོགས་པས། །

བསྟན་པའི་སྙིང་པོ་བཀའ་བརྒྱུད་པའི། ། རྟོགས་ལྡན་ཀུན་གྱི་རྒྱལ་པོར་གྱུར། །

དེང་སང་གསེར་ལྟར་དཀོན་པ་ཡི། །  དཔལ་རྩེ་དབྱིངས་སོགས་ཡོ་གའི་ཆོས། །

རྫོགས་པར་གསན་ནས་ཐུགས་ཉམས་བཞེས། ། བླ་མེད་སྤྱི་དང་ཁྱད་པར་དུ། །

བདེ་དགྱེས་གསང་གསུམ་སྨིན་གྲོལ་དང་། ། རྒྱུད་ཀྱི་བཤད་བཀས་དོན་གཉིས་མཛད། །

བུ་དོལ་རྗེས་འབྲངས་བཅས་པ་ཡི། ། གསུང་རབ་ཀུན་ལ་སྲི་ཞུ་སྤེལ། །

ལུགས་བཟང་གསེར་གྱི་ཉག་ཐག་ནི། ། ཕྲ་མོར་གྱུར་པའི་སྲོལ་མཐུད་པས། །

བསྟན་པའི་གསལ་བྱེད་ཇོ་ཞལ་གྱི། ། བསྟན་འཛིན་ཀུན་གྱི་རྩེ་མོར་སོན། །

ལྷ་ཆོས་བདུན་ལྡན་བཀའ་ཐམས་ཅད། ། གདམས་ངག་ཉིད་དུ་སྟོན་པ་[402]ཡི༑ །

གཞུང་གདམས་མན་ངག་སྤྱི་དང་ནི། ། ཁྱད་པར་བཀའ་གདམས་གསར་མའི་སྲོལ། །

ལྟ་བ་དབུ་མ་འཕགས་པའི་ལུགས། ། ཐེག་ཆེན་ཤེར་ཕྱིན་ཐེག་དམན་གྱི། །

སྤྱོད་པ་འདུལ་བ་ཕྲན་དང་བཅས། ། ཆོས་ཀྱི་མ་མོ་མཛོད་ལ་སོགས། །

ཤིང་རྟ་ཆེ་གཉིས་རྗེས་འབྲངས་བཅས། ། འཕགས་བོད་མཁས་པའི་གཞུང་ལུགས་ནོར། །

འཆད་རྩོད་རྩོམ་པའི་བྱི་དོར་ལ། ། འཇིགས་མེད་སྤོབས་པའི་གཏེར་གྲོལ་བས། །

བསྟན་པའི་བདག་པོ་དགའ་ལྡན་པའི། ། དགེ་བཤེས་རི་བོ་ལྟ་བུར་བརྗིད། །

རྒྱལ་བཤེན་མཉམ་ཆགས་རྟེན་འབྲེལ་གཞུང་། ། ཉམས་པར་མ་གྱུར་བསྟན་འགྲོ་ཡི། །

ཕན་བདེ་འཕེལ་བའི་རྒྱུར་གཟིགས་ནས༑ ། གཡུང་དྲུང་བོན་གྱི་གཞུང་འཛིན་པ། །

ཀུན་ཀྱང་གཟེངས་བསྟོད་དབུགས་དབྱུང་བས། ། དེ་བསྟན་སྐྱོང་རྣམས་དབུ་འཕང་བསྟོད། །

 

གཞན་ཡང་སེམས་ཅན་གཅིག་ལ་ཡང་། །ཕན་བདེ་སྟེར་ཚད་སངས་རྒྱས་ཀྱི། །

ཕྲིན་ལས་ཉིད་དུ་གསུངས་པ་ལ། ། མཁས་དང་གྲུབ་པའི་སྙེམས་པ་ཡིས། །

ཁྱད་དུ་གསོད་པར་མི་མཛད་པས། ། གྲུབ་མཐའ་ཀུན་ལ་མ་ལྟར་མཛའ། །

ཡོན་ཏན་ཅན་རྣམས་ཕ་ལྟར་བསྔགས༑ ། ཉམ་ཆུང་ཀུན་ལ་བུ་བཞིན་གཟིགས། །

དེ་སླད་གང་ཟག་གཞན་དག་དང་། ། མ་འདྲེས་ཁྱད་པར་རྨད་ཀྱི་ཆོས། །

ཚུར་མཐོང་བློ་ངོར་ཅུང་ཟད་ཙམ། ། རྟོགས་པ་བརྗོད་པའི་ལེགས་བྱས་ཀྱིས། ། [403]

ཀུན་ཀྱང་ཀུན་མཁྱེན་བླ་མ་རྗེའི། ། རྣམ་པར་ཐར་པའི་རྗེས་ཞུགས་ནས། །

བཞེད་པ་ཡོངས་སུ་སྐོང་བ་དང་། ། ཕྲིན་ལས་ཕྱོགས་མཐར་སྤེལ་བྱེད་ཤོག །

Published: March 2022

This work is licensed under a Creative Commons Attribution-NonCommercial-NoDerivatives 4.0 International License.

Originally published for Khyentse Vision Project

Photo credit: Khyentse Vision Project

མཆན། 

​རྒྱུ་ཆ། 

འཇམ་དབྱངས་མཁྱེན་བརྩེའི་དབང་པོ། ༢༠༡༤. ཀུན་མཁྱེན་བླ་མ་རྡོ་རྗེ་འཆང་ཆེན་པོ་འཇམ་དབྱངས་མཁྱེན་བརྩེའི་དབང་པོའི་རྣམ་ཐར་ཉུང་ངུར་བསྡུས་པ་བཞུགས་སོ།. འཇམ་དབྱངས་མཁྱེན་བརྩེའི་དབང་པོའི་བཀའ་འབུམ།, ཁ, ཤོག་ངོས་༢༩༤.༥–༢༩༩.༥. ཁམས་སྡེ་དགེ་རྫོང་སར་དགོན། རྫོང་སར་བློ་གྲོས་ཕུན་ཚོགས།. BDRC W3PD1002

 

———. ༢༠༡༣. ཀུན་མཁྱེན་བླ་མ་རྡོ་རྗེ་འཆང་ཆེན་པོ་འཇམ་དབྱངས་མཁྱེན་བརྩེའི་དབང་པོའི་རྣམ་ཐར་ཉུང་ངུར་བསྡུས་པ་བཞུགས་སོ།. མཁྱེན་བརྩེའི་བཀའ་བབས, ཀ, ཤོག་ངོས་ ༣༩༧.༡–༤༠༣.༣. དཀར་མཛེས་བོད་རིགས་རང་སྐྱོང་ཁུལ་སྡེ་དགེ་རྫོང། རྫོང་སར་ཁྱམས་བྱེའི་སློབ་གླིང་།. BDRC MW4PD2082

མཇུག་བྱང་།

ཚུལ་འདིའང་སྤྱིར་ཀུན་མཁྱེན་བླ་མ་རིན་པོ་ཆེ་ཉིད་ཀྱི་ཞལ་སྔ་ནས་སངས་རྒྱས་པའི་རིང་ལུགས་དེ་དག་འཛིན་པ་པོར་ཞལ་གྱིས་དངོས་སུ་བཞེས་པར་མ་ཟད། སོ་སོའི་བསྟན་སྐྱོང་ཁྱད་པར་འཕགས་པ་མཐུན་སྣང་དུ་གྲུབ་པ་དང་། བྱེ་བྲག་ཁོ་བོ་དམན་པ་གུ་ཎའི་མིང་ཅན་ལ་བོང་བ་གསེར་གཟིགས་ཀྱི་ཉམས་རྟོགས་འཁྲུངས་ཚུལ་གསུང་གི་བདུད་རྩི་ཐུན་མིན་སྩལ་བ་ཐོབ་པའི་སྐལ་བ་བཟང་པོ་ཉམས་སུ་མྱོང་བ་ལ་བརྟེན། ལྷག་པར་དད་ཅིང་གུས་པའི་ཡིད་ཀྱི་ཕྱོགས་ཙམ་བརྗོད་པ་སྐྱེ་བ་ཀུན་ཏུ་བླ་མ་དམ་པའི་གསང་གསུམ་ཕྲིན་ལས་དང་མཉམ་པ་ཉིད་བརྙེས་པའི་རྒྱུར་གྱུར་ཅིག ། དགེ་ལེགས་འཕེལ།།

༄༅། ། ཀུན་མཁྱེན་བླ་མ་རྡོ་རྗེ་འཆང་ཆེན་པོ་འཇམ་དབྱངས་མཁྱེན་བརྩེའི་དབང་པོའི་རྣམ་ཐར་ཉུང་ངུར་བསྡུས་པ་བཞུགས་སོ།།

སྙིང་བསྡུ།

Jamgön Kongtrul Lodrö Taye praises Jamyang Khyentse Wangpo’s profound accomplishment in many of Tibet’s spiritual traditions. This work is an inspiring telling of the teacher’s life.

English | བོད་ཡིག

TRADITION

Karma Kagyu

HISTORICAL PERIOD

19th Century

TRANSLATOR

Tib Shelf

༄༅། ། ཀུན་མཁྱེན་བླ་མ་རྡོ་རྗེ་འཆང་ཆེན་པོ་འཇམ་དབྱངས་མཁྱེན་བརྩེའི་དབང་པོའི་རྣམ་ཐར་ཉུང་ངུར་བསྡུས་པ་བཞུགས་སོ།།

Alongside our own publications, Tib Shelf peer reviews and publishes the works of aspiring and established Tibetologists. If you would like to publish with us or request our translation services, please get in touch, our team would be pleased to help. Tib Shelf has been accredited by the British Library with the International Standard Serial Number (ISSN):  2754–1495

Contact

shelves@tibshelf.org

 

+44 (0) 203 983 7265

Follow Us

Subscribe

Instagram

 

Facebook

Donate