རྒྱལ་སྲས་ལྷ་ལུང་དཔལ་གྱི་རྡོ་རྗེས་གླང་དར་མ་བསྒྲལ་ནས། འབྲི་ཟླ་ཟལ་བོའི་སྒང་དང། ཚ་བ་སྒང་། སྨར་ཁམས་སྒང་། སྤོ་འབོར་སྒང་། དམར་རྫ་སྒང་། མི་ཉག་རབ་སྒང་བཅས་མདོ་ཁམས་སྒང་དྲུག་གི་གནས་སུ་སྒྲུབ་པ་ཉམས་བཞེས་ཀྱི་ཆིབས་སྒྱུར་གནང་སྐབས། ཧོར་བྲག་འགོ་དགོན་པ་འདི་ཉིད་ཐོག་པར་ཕྱག་བཏང་གནང་བ་རེད། (སྤྱི་ལོ་དགུ་བརྒྱ་ཉི་ཤུ་ཡས་མས་ཤིག།)

​

གཞན་ཡང་ལྷ་རི་མཆོད་རྫོང་སྨུག་པོ། རྡོ་རི་བར་ཟིང་གི་གནས་མཆོག་གནས་ཡུལ་མཁའ་འགྲོ་འདུ་བའི་བསྒྲུབ་ཕུག་སོགས་སུ་ཡུན་རིང་སྒྲུབ་པ་ཉམས་བཞེས་ཐུགས་མཐིལ་དུ་མཛད་ནས་བཞུགས་པ་ད་ལྟ་མཐོངས་སུ་ཡོད་པ་དང་། ཕྱོགས་བཅུའི་རྒྱལ་དང་རྒྱལ་སྲས་རྣམས་དངོས་འབྱོར་ཡིད་སྤྲུལ་གྱི་མཆོད་པ་བསམ་གྱིས་མི་ཁྱབ་པས་ཚོགས་བསགས་དགོས་པའི་བརྡ་རྟགས་སུ། དགོན་གནས་ར་མ་སྒང་གི་རྡོའི་སྟེང་དུ་མཆོད་པའི་དབྱིབས་རྗེས་ད་ལྟ་ཡང་མངོན་སུམ་དུ་མཇལ་རྒྱུ་ཡོད།

 

དེ་ནས་(སྤྱི་ལོ་༡༦༦༣ལོ)ལྷར་བཅས་འགྲོ་བའི་གཙུག་རྒྱན་རྒྱལ་མཆོག་ལྔ་པ་ངག་དབང་བློ་བཟང་རྒྱ་མཚོའི་ཐུགས་ཀྱི་སློབ་ཆེན་རྫ་ཆོས་རྗེ་ངག་དབང་ཕུན་ཚོགས་ཀྱིས་ཧོར་བྲག་འགོ་དགོན་འདི་ཉིད་བཀའ་གདམས་གསར་མའི་ཆོས་ལུགས་སུ་བསྒྱུར་ཏེ་དགའ་ལྡན་རབ་བརྟན་རྣམ་རྒྱལ་གླིང་གི་ཆོས་གྲྭ་རྒྱལ་བསྟན་ཡིད་བཞིན་ནོར་བུ་དབང་གི་རྒྱལ་པོ་ཕྱོགས་ལས་རྣམ་པར་རྒྱལ་བའི་སྡེ་ཞེས་སྙན་གྲགས་ཀྱི་རྒྱལ་རྔ་ཀུན་བཟོད་ཀྱི་ལྟེ་བ་འགངས་པར་མཛད་པའོ།  

 

སྐབས་འདིར་ས་ལ་སྤྱོད་པའི་སེམས་དཔའ་ཆེན་པོའི་རྣམ་པར་རོལ་བ། དཔོན་དྲིན་རྗེ་ཚེ་བསྟན་ནོར་བུ་ཞེས་བྱ་བའི་ས་སྐྱོང་ཆེན་པོ་ནི། ཇོར་ཇིང་གིར་གནམ་གྱི་རྒྱལ་པོ་ལས་རིམ་པར་བརྒྱུད་པའི། ཧོར་གོ་དོན་རྒྱལ་པོ་ཞེས་པའི་གདུང་རྒྱུད་ནས་ཆད་པ་ཞིག་འཁྲུངས་ནས། རྒྱ་བོད་ཀྱི་སྲིད་སྐྱོང་བའི་རྒྱལ་པོ་རྣམས་ལ་སྙན་སྒྲོན་ཕུལ་ཏེ། ཧོར་བྲག་འགོའི་ཆོས་སྡེ་དགའ་ལྡན་རབ་བརྟན་རྣམ་རྒྱལ་གླིང་གི་རྟེན་གྱི་གཙོ་བོ་ཇོ་བོ་རིན་པོ་ཆེ་ཉིད་སྟོན་པ་དངོས་ཀྱི་ཞལ་སྐྱེན་དུ་རྒྱུ་དངུལ་དཀར་རིན་ཆེན་གཉིས་པས་བྱས་ཤིང་། བཟོ་བོ་བལ་ཡུལ་སོགས་ནས་གདན་དྲངས་ཏེ་འབྱོར་སྒྲོས་ཤིང་སྤུས་ལེགས་པ་ཞིག་གདུལ་བྱ་རྣམས་ཀྱི་བསོད་ནམས་ཀྱི་ཞིང་སར་བསྐྲུན། 

​

རྟེན་མཆོག་དེ་ཉིད་བཞུགས་གནས་ཀྱི་༼གནང་ཧོ་ལ༽་བཅས་པ་གསར་བསྐྲུན་གནང་སྟེ། ངོ་མཚར་རྨད་བྱུང་བཀོད་པའི་གཙུག་ལག་ཁང་ཞེས་མཚན་གསོལ་ཞིང་། རྒྱ་ཡིག སོག་ཡིག བོད་ཡིག་༼ཚེ་བདེ་གླིང་༽སུམ་སྦྲེལ་གྱི་ཕྱག་རྟགས་གནང་བའང་༼གནང་ཧོ་ལ༽དེ་ཉིད་ཀྱི་སྒོ་ཐོག་ཏུ་ཡོད་དོ།

 

སྤྲུལ་པའི་ལྷ་བཟོ་ནམ་མཁའ་རྒྱན་ཞེས་བཟོ་རྩལ་གྱི་ཡོན་ཏན་ལ་གཞན་གྱིས་བསྒྲུན་དུ་མེད་པ་ཞིག་བྲག་འགོའི་དཀྲོ་པ་ཞེས་པའི་གྲོང་དུ་སྐུ་འཁྲུངས།  ཁོང་ཆུང་བྱིས་པའི་དུས་ཕྱུགས་རྫི་རུ་ཕེབས་སྐབས་རྨི་ལམ་གྱི་སྣང་ངོར། སློབ་དཔོན་མཚོ་སྐྱེས་རྡོ་རྗེས་ཞལ་གཟིགས་ཏེ། དེང་ནས་ཁྱེད་ཀྱིས་ལྷ་བྲིས་ཤིག་དང་འགྲོ་དོན་རྒྱ་ཆེན་པོ་འོངས་གསུངས་ནས་བྲིས་ཆས་ཚང་མ་གནང་བ་དང་། གཉིད་སད་ཚེ་སྔོན་གྱི་བག་ཆགས་མང་པོ་དྲན་ཅིང་པིར་བཞི་དང་བྲིས་ཆས་ཚད་ལྡན་ཞིང་མངོན་སུམ་དུ་ཡོད་པ་བདག་སྤྲོད་བྱས་ཏེ། འབད་བརྩོན་གྱིས་སྦྱངས་མི་དགོས་པར་སྐྱེས་སྟོབས་ཀྱིས་ལྷ་བྲི་བ་ལ་ཐོགས་པ་མེད་པ་བྱུང་བས་སྤྲུལ་བའི་ལྷ་བཟོ་ཞེས་ཡོངས་སུ་གྲགས་པ་དེ་ཉིད་ཀྱིས་ཕྱག་བྲིས་གནང་བའི་རྒྱན་དྲུག་མཆོག་གཉིས་དང་། བདེ་ཆེན་ཞིང་བཀོད་སོགས་ཀྱི་ཞལ་ཐང་དང་ངོས་རིས་སོགས་བཟོ་རྩལ་ཀྱི་ཁྱད་ཆོས་ལྡན་ལ་བྲིས་བྱིན་རླབས་ཀྱི་གཟི་འོད་འཕྲོ་བ་བཅས་ཀྱི་རྟེན་མཆོག་མང་དུ་བཞུགས། 

 

གཞན་ཡང་ནས་འབྲུ་གཅིག་གི་སྟེང་དུ་གངས་རི་དང་སེང་གེ་ཁ་སྤྲོད་བརྐོ་ཐུབ་པའི་ཤིང་རྐོའི་ལག་རྩལ་ལ་མངའ་དབང་བརྙེས་པ་ཞིག་བྲག་འགོའི་བྲག་རྒྱབ་གྲོང་དུ་འཁྲུངས་ནས་དེས་བཀའ་གདམས་ལྷ་བཞི་དང་། ༼དགོན་པའི་མཚན་བྱང་སོག་ཡིག་ཏུ་ཡོད་པར་ཡིག་ཆར་གསལ་ཡང་བརྙེས་སོན་མ་བྱུང་།༽ བཏགས་གྲོལ། ཀུན་ཏིགས་དཀྱིལ་འཁོར། ཐུགས་རྗེ་ཆེན་པོ་སོགས་ཀྱི་པར་ཤིང་བསྐོས་པ་སོགས་གཙོས་པའི་སངས་རྒྱས་བྱང་སེམས་སོགས་ཀྱི་སྐུ་བརྙན་དང་གསུང་རབ་ཀྱི་པར་ཤིང་མང་དུ་བཞུགས།

 

བྲག་འགོ་དགོན་དེར་མཚན་ཉིད་གྲྭ་ཚང་ཇི་ལྟར་དབུ་བརྙེས་པའི་ཚུལ་ནི། 

​

དཀར་མཛེས་སྐུ་ཞབས་འཁྲུངས་སར་བླ་མ་བློ་བཟང་ཕུན་ཚོགས་ཀྱི་གཟིམ་ལམ་དུ། དམ་སྲི་འབྱུང་པོས་ཕྱག་མདའ་བསྒྲེངས་ཏེ་བྲག་དགོན་དཀྲུགས་གྲབས་བྱེད་པའི་འདིའི་འགོག་སྲུང་ལ། མཚན་ཉིད་གྲྭ་ཚང་འཛུགས་ན་ཕན་པ་ཡོད་པར་དགོངས་ནས། བྲག་འགོའི་སྲིད་འཛིན་རྣམས་ཁོང་གི་མདུན་དུ་བཅར་ནས་ལོ་རྒྱུས་ཞིབ་པར་གསུངས་པས། བྲག་འགོའི་མི་རྣམས་ཀྱིས་མཚན་ཉིད་ཆོས་གྲྭ་ཁྱེད་ཕེབས་ཏེ་འཛུགས་དགོས་ཞེས་ཞུ་བ་ཕུལ་ཚེ།  བླ་མ་བློ་བཟང་ཕུན་ཚོགས་ཁོང་གིས་གསུང་རྒྱུར།  སྔར་རྒྱལ་དབང་ལྔ་པ་ཆེན་པོས་ཨ་མདོ་འཇམ་དབྱངས་བཞད་པ་ལ། ཧོར་གྱི་དགོན་སྡེ་བཅུ་གསུམ་དུ་མཚན་ཉིད་ཆོས་གྲྭ་རེ་བཙུག་དགོས་པའི་བཀའ་གནང་ཡོད། འཇམ་དབྱངས་བཞད་པ་གདན་འདྲེན་གྱིས་ཤིག་ཅེས་བཀའ་བསླབ་ཕེབས་པ་ལྟར། 

 

སྔོན་ལ་བང་ཆེན་བཏང་ཞིང་།  རིམ་བཞིན་བྲག་འགོ་ཡུལ་གྱི་སེར་སྐྱ་བརྒྱ་ཕྲག་ཙམ་བྱང་བླ་བྲང་བཀྲ་ཤིས་འཁྱིལ་ཨ་མདོ་འཇམ་དབྱངས་བཞད་པ་གདན་འདྲེན་དུ་སོང་། སྔོན་གྱི་བང་ཆེན་གྱི་ངག་ལམ་བརྒྱུད་དེ།  འཇམ་དབྱངས་བཞེད་པ་ཕེབས་པ་ན།  བྱོན་པའི་དུས་བབས་ཐོག་ཏུ་མ་ཁེལ་བས། ཆུ་ཆེན་པོ་ཞིག་སྔར་དང་མི་འདྲ་བ་ཤུགས་དྲགས་ཤིང་རྦ་རླབས་འཕྱུར་བ་ཕན་ཚུན་འགྲོ་བའི་དུས་སྐབས་བཀག་ཅིང་། ཡུན་རིང་དུ་གནས་པའི་སྐབས་སུ་འཇམ་དབྱངས་བཞད་པས་ཕེབས་པའི་དུས་བབས་མ་ཡིན་པར་དགོངས་ཏེ།  ཆུ་རྐྱལ་མཁས་པའི་སྐྱེས་བུ་ཞིག་མངགས་ནས་ད་སྐབས་ཁོ་བོ་བྲག་འགོ་རུ་ཕེབས་དུས་སྐབས་མིན་ཡང་།  ནམ་ཞིག་ན་འཇམ་དབྱངས་མིང་ཅན་གྱི་སྐྱེས་བུ་ཞིག་གིས་བྲག་འགོ་དགོན་དུ་མཚན་ཉིད་གྲྭ་ཚང་འཛུགས་པར་འགྱུར་ཞེས།  ཡི་གེ་དང་གསུངས་འཕྲིན་བཅས་བསྐུར་གནང་བྱེད་པས་སོ་སོར་རང་ཡུལ་དུ་ལོག་གོ།  

 

ཕྱིས་སུ་འཇམ་དབྱངས་བཞད་པའི་སྐུ་ཕྲེང་། འཇམ་དབྱངས་ཟུར་པ་ཁོང་།  སེ་ར་ཀེའུ་ཚང་རི་ཁྲོད་དུ་བཞུགས་ཤིང་།  རིམ་པར་ཁམས་ཕྱོགས་སུ་ཕེབས་ནས་བྲག་འགོ་དགོན་དུ་(སྤྱི་ལོ་༡༨༡༧)རབ་བྱུང་བཅུ་བཞི་ལོར་དབང་ཕྱུག་ཆེས་པ་མེ་མོ་གླང་གི་ལོར་དགའ་ལྡན་རབ་བརྟན་རྣམ་རྒྱལ་གླིང་དུ་མདོ་ཕྱོགས་ཀྱི་མཚན་ཉིད་ཆོས་གྲྭ་དབུ་བརྙེས།  །

 

བྲག་འགོ་དགོན་འདིར་བླ་མ་སྐྱེས་བུ་དམ་པ་ཇི་ལྟར་བྱོན་པའི་ལོ་རྒྱུས་ནི།

དང་པོ། རྗེ་བཙུན་བླ་མ་དམ་པ་ཀེའུ་ཚང་བློ་བཟང་བསྟན་འཛིན་ཡར་རྒྱས་དཔལ་བཟང་པོ་ནི། 

​

དཀར་མཛེས་མཁར་ཤུལ་གྲོང་དུ་ཡབ་ཚེ་བརྟན་དང་ཡུམ་ཨ་མཚོ་གཉིས་ཀྱི་སྲས་སུ་ཤིང་ལུག་ནག་པ་ཟླ་བའི་ཚེས་བཅོ་ལྔ་ལ་སྐུ་བལྟམས། དགུང་ལོ་བདུན་པར་འཁྲུངས་སར་རྡོ་རྗེ་འཆང་བློ་བཟང་ཕུན་ཚོགས་མཐུ་སྟོབས་རྒྱ་མཚོ་དཔལ་བཟང་པོ་ལས་རབ་ཏུ་བྱུང་། སྐུ་ཞབས་བློ་གྲོས་ཕུན་ཚོགས་ཀྱིས་ཀེའུ་ཚང་བླ་མ་དཔོན་སློབ་བྱམས་པ་སྨོན་ལམ་གྱི་ཡང་སྲིད་དུ་ངོས་འཛིན་གནང་། དགུང་གྲངས་བཅུ་གཉིས་ཐོག་ལྷ་ལྡན་དུ་ཕེབས་ཏེ། སྐྱབས་མགོན་ཐམས་ཅད་མཁྱེན་པ་མཁས་གྲུབ་རྒྱ་མཚོ་སོགས་དགེ་བའི་བཤེས་གཉེན་མང་པོ་བསྟེན་ནས་མདོ་སྔགས་ཀྱི་ཆོས་མཐའ་དག་ལ་གསན་སྦྱངས་མཛད་དེ། སླར་ཁམས་ཕྱོགས་སུ་ཕེབས་ནས་ཧོར་བྲག་དགོན་པའི་ལུང་རྟོགས་ཀྱི་བསྟན་པ་བདག་གིར་བཞེས་ཤིང་གདུལ་བྱ་ཐུགས་བརྩེ་བས་བསྐྱངས་།

 

འདིའི་གསུངས་རྩོམ་ཡང་༼བླ་མ་ལྔ་བཅུ་པ་།༽ དང་༼རྩ་ལྟུང་བཅུ་བཞི་སྦོམ་པོ་བརྒྱད་ཀྱི་བཤད་ལུང་སྩལ་སྐབས་ཀྱི་ཟིན་བྲིས་རྒྱུད་སྡེ་སྙིང་པོ།༽ཞེས་བྱ་བ་དང་། ༼བྱང་ཆུབ་ལམ་གྱི་རིམ་པ་དང་ཐེག་པ་ཆེན་པོའི་བློ་སྦྱོང་ཟུང་འབྲེལ་དུ་ཉམས་སུ་ལེན་ཚུལ་རྒྱལ་སྲས་དེད་དཔོན་ཚོགས་ཀྱི་འཇུག་ངོགས་ཚོགས་གཉིས་རྒྱ་མཚོར་བགྲོད་པའི་གྲུ་རྫིངས་།༽ ༼བླ་མའི་བཀའ་དྲིན་དྲན་པའི་བསྟོད་དབྱངས་དད་པའི་ཆུ་རྒྱུན།༽ ༼འོད་དཔག་མེད་ལ་བརྟེན་པའི་རྣལ་འབྱོར་དང་འཕོ་བའི་ཉམས་ལེན་ཟུང་དུ་འབྲེལ་བའི་མན་ངག་བདེ་ཆེན་ལམ་བཟང་སྟོན་པའི་ས་མཁན།༽ཞེས་བྱ་བ་སོགས་གསུངས་ཆོས་མང་དུ་ཡོད་དོ།

 

སྐུ་ཚེ་དེ་ལ་གདུལ་བྱའི་སྣང་ངོར་མཇུག་བསྡུས་ཏེ། རང་བཞིན་བདེ་སྟོང་ཆོས་ཀྱི་དབྱིངས་ལ་མཉམ་པར་བཞག་ནས་གཟུགས་སྐུའི་བཀོད་པ་བསྡུས་སོ།  དམ་པ་འདིའི་ཡང་སྤྲུལ་སྒང་ཞབས་ཞེས་བྱ་བའི་གྲོང་དུ་ཐེངས་གཉིས་འཁྲུངས་ཀྱང་གཉིས་ཀ་ཡུན་རིང་མ་བཞུགས་པར་གཤེགས།

 

དེ་ནས་ཀེའུ་ཚང་མཆོག་སྤྲུལ་རིན་པོ་ཆེ་ཐུབ་བསྟན་དཔལ་ལྡན་དགེ་ལེགས་རྣམ་རྒྱལ་ནི། ཤར་མི་ཉག་ཤ་ཕོ་གཤིས་ཞེས་པའི་ས་ཆ་རུ་ཡབ་ཨ་པོ་ཞེས་བྱ་བ་དང་མ་ཡུམ་ཚེ་རིང་སྒྲོལ་མ་གཉིས་ཀྱི་སྲས་སུ་རབ་བྱུང་བཅོ་ལྔ་པའི་ཆུ་ཕོ་སྟག་གི་ལོ་ལ་སྐུ་འཁྲུངས། གཟིགས་རྒྱབ་རྡོ་རྗེ་འཆང་ཆེན་པོས་ཀེའུ་ཚང་མཆོག་གི་ཡང་སྲིད་ཡིན་པར་ལུང་གིས་བསྔགས་ཤིང་ངོས་འཛིན་གནང་། དགུང་ལོ་བཞི་པ་ཤིང་སྤྲུལ་ཟླ་བ་༡༡ཚེས་༡༦ཉིན་བྲག་འགོ་དགོན་པས། སེང་ལྡེང་རི་ཁྲོད་བདེ་ཆེན་བསམ་གཏན་གླིང་དུ་གདན་དྲངས་ནས་གཟིམ་ཆུང་བཀྲ་ཤིས་ཉི་འོད་འཁྱིལ་བ་རུ་བཞུགས་སུ་གསོལ། དགུང་ལོ་བརྒྱད་པའི་ཐོག་ཧོར་བྲག་འགོ་དགོན་པའི་ཁྲི་ལ་ཞབས་སོར་འཁོད། རིམ་པར་ལྷ་ལྡན་དུ་ཕེབས་ནས་མདོ་སྔགས་ཀྱི་ཆོས་ཐམས་ཅད་ལ་གསན་སྦྱངས་མཛད་དེ། མཁས་བཙུན་གྱི་ཡོན་ཏན་བསམ་གྱིས་མི་ཁྱབ་ཅིང་། རྒྱ་བོད་གཉིས་ལ་ཉི་ལྟར་དུ་གྲགས་པ་བྱུང་ངོ་། 

 

བྲག་དཀར་སྤྲུལ་པའི་སྐུ་བློ་བཟང་དཔལ་ལྡན་བསྟན་འཛིན་སྙན་གྲགས།

​

རབ་བྱུང་བཅོ་ལྔ་པའི་ནང་དུ་བྲག་དཀར་སྤྲུལ་བའི་སྐུ་བློ་བཟང་དཔལ་ལྡན་བསྟན་འཛིན་སྙན་གྲགས་ཞེས་པའི་མཁས་པ་ཆེན་པོ་བྱུང་སྟེ་བསྐལ་བཟང་རྣམ་འདྲེན་བཞི་པའི་བསྟན་པ་དང་བྱེ་བྲག་འཇམ་མགོན་བླ་མ་ཙོང་ཁ་པ་ཆེན་མོའི་ལུང་རྟོགས་ཀྱི་བསྟན་པ་རིན་པོ་ཆེའི་རྒྱལ་མཚན་བཤད་སྒྲུབ་ཟུང་གིས་སྲིད་པའི་མཁའ་རུ་བསྒྲེངས། ཁོང་གིས་ལྗགས་རྩོམ་གནང་བ་ལ་མདོ་སྔགས་རིག་གནས་པོད་བཅུ་གཉིས་ཡོད། ཁོང་གིས་བྲག་འགོའི་དགེ་ཐར་ལུང་པ་སོགས་བཞུགས་གནས་ཀྱི་གཙོ་བོ་མཛད་དོ། 

 

ཁྲི་རིན་པོ་ཆེ་བྱམས་པ་ཆོས་གྲགས།

 

ཁྲི་རིན་པོ་ཆེན་བྱམས་པ་ཆོས་གྲགས་ནི་ཝ་ལུང་གྲོང་དུ་སྐུ་འཁྲུངས་ཏེ་ཆུང་བྱིས་པའི་དུས་ནས་བྲག་དགོན་ཆོས་གྲྭར་ཞུགས་ནས་ཚད་མ་དང་ཕར་ཕྱིན་སོགས་ལ་སློབ་གཉེར་མཛད། དགུང་ལོ་བཅོ་ལྔའི་ཐོག་དབུས་སུ་ཕེབས་ཏེ་འབྲས་སྤུངས་སུ་གཞུང་ཆེན་པོ་ཏི་ལྔ་ག་ཐོས་བསམ་མཐར་ཕྱིན་པར་མཛད་ཅིང་དགེ་བཤེས་ལྷ་རམ་ཨང་དང་པོའི་མཚན་སྙན་བཞེས། དཔལ་ལྡན་རྒྱུད་གྲྭ་ཚང་དུ་ཞུགས་ནས་གསང་བ་སྔགས་ཀྱི་གཞུང་ལ་ཐོས་བསམ་མཛད་དེ་མཁས་པའི་དབང་པོ་གྱུར་ནས་རྒྱུད་སྨད་ཀྱི་མཁན་པོ་མཛད་ཅིང་བྱང་རྩེའི་ཁྲིར་ཕེབས། ༼སྤྱི་ལོ་༡༩༢༠ལོར་༽དགའ་ལྡན་གསེར་ཁྲིར་ཞབས་སོར་འཁོད་དེ་འཁོར་གསུམ་གྱི་འཕྲིན་ལས་མི་ནུབ་པའི་རྒྱུན་བསྲིངས་པའི་མཛད་རྣམ་རྨད་དུ་བྱུང་བ་དང་། ཁྲི་ཟུར་ནས་བལ་ཡུལ་དུ་འཕགས་པ་ཤིང་ཀུན་གྱི་མཆོད་རྟེན་ལ་ཉམས་གསོ་དང་། རབ་གནས་བྱས་ཤིང་མཆོད་པ་རྒྱ་ཆེན་པོས་བསྙེན་བཀུར་ཞུས་ཏེ་མཚན་སྙན་གྱི་དབྱར་རྔ་ལྡིར། མཐར་དགོངས་པ་ཆོས་ཀྱི་བྱིངས་སུ་གཤེགས། དེའི་ཡང་སྤྲུལ་བྱམས་པ་ཆོས་ཀྱི་བསྟན་དར་ནི་ལྷ་ལྡན་དུ་སྐུ་འཁྲུངས། ཆུང་ངུའི་དུས་ནས་གྲྭ་སར་བཞུགས་ཏེ་ཡི་གེ་དང་དཔེ་ཆ་ལ་གསན་སྦྱངས་མཛད། སླར་བྲག་འགོ་དགོན་དུ་ཕེབས་ནས་ཁྲིར་འཁོད་ཅིང་སྨོན་ལམ་གྱི་དབུ་བཞུགས་མཛད་དེ་བསྟན་འགྲོའི་དོན་རླབས་ཆེན་མཛད་དོ།

 

སྤྲུལ་སྐུ་བློ་བཟང་དཔལ་ལྡན་བསྟན་པའི་རྒྱལ་མཚན།

 

མཁན་པོ་བློ་བཟང་དབང་ཕྱུག་གི་ཡང་སྤྲུལ་བློ་བཟང་དཔལ་ལྡན་བསྟན་པའི་རྒྱལ་མཚན་ནི། བྲག་འགོའི་ནོར་པ་ཞེས་པའི་འབྲོག་ཁུལ་དུ་སྐུ་འཁྲུངས། དགུང་ལོ་ཉི་ཤུའི་ཐོག་ལྷ་ལྡན་དུ་ཕེབས་ནས་གྲྭ་སར་བཞུགས། མདོ་སྔགས་ཀྱི་ཆོས་ལ་ཐོས་བསམ་རྒྱ་ཆེན་པོ་མཛད། སླར་རང་ཡུལ་དུ་ཕེབས་དེ་བསྟན་པ་ཉམས་གསོ་དང་གདུལ་བྱའི་སེམས་ཅན་རྣམས་ལ་ཕན་པ་རྒྱ་ཆེན་པོ་མཛད་ནས་དགུང་གྲངས་རེ་གཅིག་ལ་སྐུ་གཤེགས་སོ། 

 

གྲུབ་དབང་བྱ་བྲལ་བ་ཏྲེ་ཧོར་སྐྱོར་དཔོན་པོ་རིན་པོ་ཆེ་ཚེ་དབང་ནོར་བུ།

​

གྲུབ་དབང་བྱ་བྲལ་བ་ཏྲེ་ཧོར་སྐྱོར་དཔོན་པོ་རིན་པོ་ཆེ་དགེ་ཚེ་དབང་ནོར་བུ་ནི་བྲག་འགོ་རྫོང་གི་ཉེ་འགྲམ་དུ་དཀྲོ་པ་ཞེས་པའི་གྲོང་དུ་སྐུ་འཁྲུངས་ཤིང་། སྐུ་ཆུང་ངུའི་དུས་ནས་ཐ་མལ་བའི་སྤྱོད་པ་དང་བྲལ་བ་མཆོག་གསུམ་ལ་དད་པ་དང་བརྟན་ཅིང་ངེས་འབྱུང་བྱང་སེམས་ཡང་དག་པའི་ལྟ་བ་ཐུགས་རྒྱུད་ལ་འཁྲུངས་ཤིང་། ཁོང་བྲག་འགོ་དགོན་གྱི་ཆོས་གྲྭར་ཕེབས་ཏེ་ཐོས་ཀློག་གི་མཛད་པ་བཞེས། དེ་ནས་ལྷ་ལྡན་འབྲས་སྤུངས་ཀྱི་གྲྭ་སར་བཞུགས་ནས་གཞུང་ཆེན་རྣམས་ལ་གསན་བསམ་རྒྱ་ཆེར་བཞེས་པས་དགེ་བཤེས་ལྷ་རིམ་ཨང་དང་པོའི་མཚན་སྙན་ཐོབ། རིམ་བཞིན་དཔལ་ལྡན་རྒྱུད་སྨད་གྲྭ་ཚང་དུ་ཞུགས་ནས་གསང་ཆེན་སྔགས་ཀྱི་གཞུང་ལའང་ཐོས་བསམ་མཛད་དེ་མཐར་འཇིག་རྟེན་འདི་བའི་བྱ་བཞག་ཡོངས་སུ་སྤངས། སྒོ་གསུམ་དབེན་པར་བརྟེན་དེ་ཐོས་དོན་ཉམས་སུ་བསྟར་བས་མངོན་རྟོགས་ཀྱི་རིམ་པ་རྒྱུད་ལ་འཁྲུངས་བས་རྗེ་མི་ལ་གཉིས་པ་ཞེས་མཁས་གྲུབ་ཀུན་གྱི་སྤྱི་བོའི་ཅོད་པན་དུ་བཀུར་བ་བྱུང་ངོ་།། 

 

སྐུ་ཞབས་བྱམས་པ་རིན་པོ་ཆེ།

 

སྐུ་ཞབས་བྱམས་པ་རིན་པོ་ཆེ་ནི། སྐུ་ཕྲེང་དང་པོ་ཧོར་གྱི་བླ་མ་བློ་བཟང་ཞེས་བྱ་བའི་དཔོན་གྱི་སྐུ་རིམ་པ་བླ་མ་ཉི་ཤུ་རྩ་ལྔའི་ནང་ནས་སློབ་དཔོན་ཡིན།  སྐུ་ཉིད་ཀྱི་བཞུགས་ཡུལ་ནི་བཟང་ར་རི་ཁྲོད་དུ་བྱས་ནས་སྒྲུབ་པ་ཉམས་བཞེས་མཛད་དེ་མཐར་གཟུགས་སྐུའི་བཀོད་པ་བསྡུས། སྐུ་ཕྲེང་གཉིས་པ་དགེ་བཤེས་མགོན་པོ་རིན་ཆེན་བྲག་འགོའི་ནོར་བ་ཞེས་པའི་འབྲོག་ཁུལ་དུ་སྐུ་འཁྲུངས་། དབུས་གཙང་ལྷ་ལྡན་གྱི་གྲྭ་སར་ཕེབས་ཏེ་དགེ་བཤེས་ཀྱི་མཚན་བཏགས་བཞེས། དེ་ནས་རང་ཡུལ་དུ་ཕེབས་ནས་བཤད་ཁྲིད་དང་དབང་ལུང་མང་དུ་སྩལ། མཐར་བྱ་བྲལ་བའི་སྤྱོད་པ་བདག་གིར་བཞེས་ནས་གསུང་རབ་ཀྱི་སྙིང་པོ་ཉམས་སུ་བསྟར་བས་གྲུབ་པའི་གོ་འཕངས་མཐོར་པོར་གཤེགས། སྐུ་ཕྲེང་གསུམ་པ་སྐུ་ཞབས་བྱམས་པ་ཐུབ་བསྟན་རིན་ཆེན་ནི།  རྟའུ་རུ་སྐུ་འཁྲུངས་ཕུར་ཅོག་བྱམས་པ་རིན་པོ་ཆེས་ངོས་འཛིན་གནང་། སྐུ་ཞབས་མཁན་སྤྲུལ་གྱིས་སྐུ་བདག་བྱས་ཏེ། དགུལ་ལོ་བཅོ་ལྔའི་ཐོག་ལྷ་ལྡན་དུ་ཕེབས་ནས་འབྲས་སྤུངས་གྲྭ་སར་ཞུགས། ཚོགས་ཆེན་སྤྲུལ་སྐུའི་མཚན་བཞེས་གནང་། གཞུང་པོ་ཏི་ལྔ་ལ་གསན་བསམ་དཔྱིས་ཕྱིན་མཛད།   ༼ཕྱི་ལོ་༡༩༥༠ལོར་འཕགས་ཡུལ་དུ་ཕེབས་ནས་མཁས་བརྟན་ཡོན་ཏན་གྱི་གཟི་འོད་འགྱེད་བཞིན་ད་ལྟའང་བཞུགས།

 

གཞན་ཡང་མིའི་རྣམ་པར་བརྫུས་པའི་སྐྱེས་ཆེན་དམ་པ་དགེ་བཤེས་བསོད་ནམས་མགོན་པོ་དང་དགེ་བཤེས་ཡེ་ཤེས་ནོར་བུ་སོགས་མཁས་གྲུབ་སྡེ་སྣོད་འཛིན་པ་བར་མ་ཆད་པ་ནོར་བུའི་ཕྲེང་བ་ལྟ་བུ་བྱོན་ནས་བཤད་སྒྲུབ་ལས་གསུམ་གྱིས་འགྲོར་ཕན་རྒྱལ་བསྟན་རིན་པོ་ཆེ་སྤྱི་དང་སྒོས་བྲག་དགོན་འདི་ཉིད་ཀྱི་མདོ་སྔགས་ཟུང་དུ་འབྲེལ་བའི་བསྟན་པ་རིན་པོ་ཆེ་སྒོ་ཀུན་ནས་སྤེལ་བའི་རྣམ་ཐར་མཐའ་ཡས་ཀྱང་། དེ་དག་ཚང་མ་ཡི་གེ་ལམ་དུ་འགོད་སྤེལ་བྱས་ན་ཧ་ཅང་སྤྲོས་པར་འཇིགས་ནས་འདིར་མ་བྲིས་སོ།  །

 

དགོན་པ་འདི་ཉིད་ཀྱི་མངའ་རིས་སུ་གཏོགས་པའི་རི་ཁྲོད་ཆེ་བཞི།

​

(༡) སུ་རྒྱས་ཕུགས་ཀྱི་བཟང་ལུང་དཔལ་གྱི་རི་ཁྲོད་ནི་སྔོན་དུས་སུ་རས་པ་བྱང་ཆུབ་འོད་ཟེར་སོགས་སྐྱབས་བཞི་སྡེ་ལྔར་གྲགས་པའི་རྣལ་འབྱོར་པ་མང་པོའི་བཞུགས་གནས་ཡིན། རིམ་བཞིན་གཞན་ཡང་བློ་བཟང་ཚུལ་ཁྲིམས་བསྟན་པའི་རྒྱལ་མཚན་དང་། ལམ་བྲག་རྡོ་རྗེ་འཆང་སྐལ་བཟང་རྣམ་རྒྱལ་སོགས་ཀྱིས་བཞུགས་གནས་མཛད་ཅིང་། གྲྭ་པ་ཉེར་ལྔ་རེ་བཞུགས་པའི་ལུགས་སྲོལ་ཡོད་དོ།

 

(༢) ནོར་འུ་ཁུག་གི་ཟུང་འཇུག་དགའ་བའི་རི་ཁྲོད་ནི།  ཐོག་མར་སྟོང་སྐོར་བླ་མ་འཇམ་དབྱངས་དགེ་འདུན་རྒྱ་མཚོ་དང་། ཨ་མདོ་བླ་མ་དོན་གྲུབ་མི་ཡི་སེངྒ་གཉིས་ཀྱི་སྒྲུབ་གནས་ཡིན།  གྲྭ་པ་ཉེར་ལྔ་རེ་བཞུགས་སྲོལ་ཡོད།

​

(༣) སེང་ལྡེང་རི་ཁྲོད་ནི། སྔོན་སྤང་ནང་སྐྱབས་མགོན་ཞ་ལུ་བའི་གདན་ས་རེད། དེ་རྗེས་ཨ་བླ་དགེ་བཤེས་ཡེ་ཤེས་བརྩོན་འགྲུས་བཞུགས། དེ་རྗེས་མཁར་སར་བླ་མ་བསོད་ནསམ་བཀྲ་ཤིས། དེ་ནས་ཀེའུ་ཚང་བླ་མ་བསྟན་འཛིན་ཡར་རྒྱས། དེ་རྗེས་ཀེའུ་ཚང་ཐུབ་བསྟན་དཔལ་ལྡན་དགེ་ལེགས་རྣམ་རྒྱལ་སོགས་ཀྱི་བཞུགས་གནས་མཛད། གྲྭ་པ་ཉེར་ལྔ་རེ་བཞུགས་པའོ།

 

(༤) བཟང་རྭ་རི་ཁྲོད་ནི།  སྔོན་ཧོར་བླ་ཉེར་ལྔའི་གསང་བ་སྔགས་ཀྱི་འཆད་ཉན་མཛད་པའི་བསྒྲུབ་གནས་སུ་དཔོན་དྲིན་རྗེ་ཚེ་བརྟན་ནོར་བུའི་ཕྱག་བཏབ་མཛད།  དེའི་རྗེས་སུ་དགེ་བཤེས་མགོན་པོ་རིན་ཆེན་གྱིས་ཇེ་རྒྱས་སུ་བཏང་།  དེ་ནས་མཁན་སྤྲུལ་བློ་བཟང་དཔལ་ལྡན་བསྟན་པའི་རྒྱལ་མཚན་དང་ཡང་སྤྲུལ་བྱམས་པ་ཐུབ་བསྟན་རིན་ཆེན་རྣམས་བཞུགས་ཤིང་།  གྲྭ་པ་ཉེར་ལྔ་དགེ་ཚུལ་མ་ལྔ་དང་དགེ་བསྙེན་ཕོ་མོ་བརྒྱ་ཕྲག་ལྷག་ཡོད་དོ།། 

 

ར་གསོ་སྒང་།

 

ར་གསོ་སྒང་ཟེར་བའི་གནས་དེར་སྔར་ཆོས་རྒྱལ་མྱ་ངན་མེད་ཀྱི་འཛམ་བུའི་གླིང་དུ་མཆོད་རྟེན་བྱེ་བ་རྫུ་འཕྲུལ་གྱིས་བཞེངས་པའི་མཆོད་རྟེན་དང་དེའི་ནང་རྟན་དུ་སངས་རྒྱས་འོད་སྲུང་གི་རིང་བསྲེལ་ཡོད་དོ། བོད་ཀྱི་རྒྱལ་པོ་སྲོང་བཙན་སྒམ་པོས། རྒྱ་ནག་གོང་མ་ཐང་ཐེ་ཙུང་གི་སྲས་མོ་འུན་ཤིང་ཀོང་ཇོ་བཙུན་མོར་བཞེས་སྐབས། ར་ས་འཕྲུལ་སྣང་གི་ས་སྤྲུལ་པའི་ར་ཞིག་ལ་བཀལ་ནས་འོང་བར། བྲག་འགོ་འདིར་བཞུགས་མལ་མཛད་དེ། ར་དེ་ཉིད་ས་ཕྱོགས་དེ་རུ་གསོ་བར་མཛད་པས། ར་གསོ་སྒང་ཞེས་གྲགས་ཤིང་། བོད་ཀྱི་བློན་པོ་རིག་པ་ཅན་དང་། ཀོང་ཇོ་གཉིས་ཀྱིས་ལྷ་ཁང་བཞེངས་ཏེ་ཇོ་བོ་གཅིག་བཞེངས་བསྐྲུན་བྱས་པར་ཡང་འདུལ་གྱི་གཙུག་ལག་ཁང་ཡིན་པར་བཤད་དོ།  །

 

དེང་སང་གི་བྲག་འགོ་དགོན་པའི་ལོ་རྒྱུས།

 

དེང་སེང་གི་བྲག་འགོ་དགོན་པའི་ལོ་རྒྱུས་མདོར་ཙམ་བཤད་པ་ནི། བསྟན་པ་ཡང་དར་གྱི་སྐབས། ཁྲི་སྤྲུལ་བྱམས་པ་ཆོས་གྲགས་བསྟན་དར་དང་།  སྐུ་ཞབས་བྱམས་པ་ཐུབ་བསྟན་རིན་ཆེན། ཁྲི་པ་དགེ་བཤེས་ཨ་རྡོར། དགེ་བཤེས་ཡེ་ཤེས་དོན་འགྲུབ། དབུ་མཛད་འཇམ་དབྱངས། གྲྭ་ཚང་དབུ་མཛད་དགོན་པ་སྐྱབས་སོགས་སེར་སྐྱ་ཡོངས་ནས་གྲོས་བརྡར་ཏེ་ལྷ་དང་༸གོང་གི་བླ་མ་རྣམས་ལ་ལུང་བསྟན་ཞུས་ཏེ་ཐུགས་རྟགས་བབས་ཡུལ་ནི་མདོ་ཁམས་ཟལ་མོའི་སྒང་གི་སྒང་རྒྱུད་ར་གསོ་བཀྲིས་སྨན་གྱི་རི་འདབས་སུ། སྤྱི་ལོ་༼༡༩༨༤༽ལོར་རབ་བྱུང་བཅུ་དྲུག་པའི་ཤིང་ཕོ་བྱི་བའི་ལོ་ཟླ་བ་བཅུ་པའི་ཚེས་བརྒྱད་ཉིན་ཧོར་བྲག་འགོ་དགའ་ལྡན་རབ་བརྟན་རྣམ་རྒྱལ་གླིང་གི་གཙུག་ལག་ཁང་གི་རྨང་གཞི་ཐོག་མར་དབུ་འཛུགས་དེ་རྒྱ་ཁྱོན་ཀ་ཐག་གྱ་བརྒྱད་ཅན་གྱི་གཙུག་ལག་ཁང་དང་། ཀ་ཐག་ཞེ་དགུ་ཅན་གྱི་ཇོ་ཁང་དང་། ཀ་ཐག་ཉེར་དགུ་ཅན་གྱི་སྔགས་ཁང་ཐོག་རྩེག་དང་བཅས་པ་སྤྱི་ལོ་༼༡༩༩༨༽ལོར་ལེགས་གྲུབ་བྱུང་།

 

༼དགོན་འདིར༽ དུས་ངན་འཁྲུགས་ལོང་གི་སྐབས་སུ་བསམ་ཤེས་ཅན་གྱི་སྐྱ་སེར་འགས་ལུས་སྲོག་འབེན་དུ་བཙུགས་ཏེ་ལྐོག་ཉར་བྱས་པའི་ནམ་མཁའ་རྒྱན་གྱི་རྒྱན་དྲུག་མཆོག་གཉིས་སོགས་ཀྱི་ཞལ་ཐང་། སྦུབ་ཆལ། སིལ་སྙན་དང་རོལ་མོའི་རིགས་ཀྱི་རྟེན་རྙིང་སོགས་དུ་མ་ཡོད་ཀྱང་མངས་སུ་དོགས་ནས་མ་བྲིས་སོ།། 

 

འཆད་ཉན་གྱི་སྐོར་ནི། མདོ་ཕྱོགས་དང་སྔགས་ཕྱོགས་གཉིས་ལས། དང་པོ་ནི། གསར་བསྐྲུན་གནང་བའི་ནང་བསྟན་སློབ་གྲྭའི་ནང་ཡི་གེ་འབྲི་ཀློག་དང་བྱིས་པ་དག་ཡིག་ནས་དབུ་འཛུགས་དེ་རྟགས་འཇུག་གི་བར་རིག་གནས་སྤྱི་དང་བློ་རྟགས་བསྡུས་གསུམ་བཅས་ལ་ཐོས་བསམ་བྱས་དང་བྱེད་བཞིན་ཡོད། གྲྭ་ཚང་གི་ཆོས་ར་བའི་ཕར་ཕྱིན་བཞི་དང་། ཚད་མ་རྣམ་འགྲེལ་ནི་འཇང་དགུན་ཆོས་ཀྱི་དཔེ་གཟིགས་ལས་འཛིན་གྲྭ་ལོགས་སུ་མེད། རྒྱུད་གཞུང་བ་རྣམ་པས་བསྙེན་ཆེན་དང་ལས་རུང་འབུམ་ལྔ་སོགས་ཀྱི་སྒྲུབ་པ་ཉམས་བཞེས་ཀྱིས་ལུང་རྟོགས་ཀྱི་བསྟན་པ་རྒྱ་ཆེན་མཛད། གཞན་ཡང་སྲོལ་རྒྱུན་གྱི་རིགས་གཞུང་མང་པོ་བདག་གིར་མཛད་ཀྱིན་ཡོད་ཀྱང་མ་བྲིས་སོ།།