༈ དེ་ལས་དང་པོ་ཕྱི་སྣོད་ས་གཞི་རི་བཅས་ཆགས་ཚུལ་ནི་ཇི་སྐད་དུ། <འཕགས་པ་སྡུད་པ་> ལས། མཁའ་ལ་རླུང་བརྟེན་དེ་ལ་ཆུ་ཡི་ཕུང་པོ་བརྟེན།  །དེ་ལ་ས་ཆེན་འདི་བརྟེན་དེ་ལ་འགྲོ་བ་བརྟེན།  ། ཞེས་གསུངས་པ་ལྟར་དེ་ཡང་འཇིག་རྟེན་གྱི་ཁམས་སྔོན་མ་དེ་ཉིད་བསྐལ་བའི་མེ་ཆུ་རླུང་གིས་འཇིག་ནས་བར་གྱི་བསྐལ་བ་ཉི་ཤུ་ཐམ་པའི་རིང་ལ་སྟོང་བ་གཅིག་ཏུ་གྱུར་ལ། དེ་ནས་འཇིག་རྟེན་གྱི་ཁམས་འདི་ཉིད་ཆགས་པ་ཡིན་ཏེ། དེའི་ཐོག་མ་རྒྱུ་སེམས་ཅན་སྤྱི་མཐུན་གྱི་ལས་ལ་བརྟེན་ནས། ཡིད་རྣམ་པར་དྭངས་པ་ཞེས་བྱ་བ་ནམ་མཁའ་དཀར་བའི་འོད་དང་ལྡན་པ་ཆེ་ཆུང་གི་ཚད་ནི་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་གཅིག་གི་སྣོད་བརྟེན་ནུས་པ་ཞིག་ཆགས་སོ།  ། དེའི་སྟེང་དུ་རླུང་གི་དཀྱིལ་འཁོར་ཆགས་ཏེ། དེ་ཡང་རྣམ་པར་སྲུབ་བྱེད་ཀྱི་རླུང་ཞེས་བྱ་བ་རླུང་སྔོ་ལ་ཕྱུར་བ་ཞིག་ལངས། དེ་ཀུན་ཏུ་ཁྱབ་བྱེད་ཀྱི་རླུང་གིས་ཕྱོགས་ཀུན་ཏུ་གདལ་བས་ནམ་མཁའ་ལ་ན་བུན་ལྟར་འཁྲིགས། དེ་རྩུབ་འགྱུར་གྱི་རླུང་ཡམ་ཞེས་བྱ་བའི་རང་སྒྲ་དང་བཅས་པས་ནམ་མཁའ་ལ་སྤྲིན་བཞིན་གཏོར། དེ་དག་རྣམ་པར་སྡུད་བྱེད་ཀྱི་རླུང་གིས་བསྡུས་པས་རྒྱ་ཆེ་ཞིང་དཔངས་མཐུག་པར་བྱས། དེ་སྨིན་བྱེད་མེའི་རླུང་དམར་སེར་ལས་མེ་མཆེད་ནས་བསྲེགས་པས་རླུང་གི་དཀྱིལ་འཁོར་འཇམ་ཞིང་ཁོད་སྙོམ་པར་ཆགས།དེ་འབྱེད་བྱེད་རླུང་གི་རླུང་ཞེས་བྱ་བ་ཁ་དོག་སྣ་ཚོགས་པ་འུར་གྱིས་ལངས་པ་ལས་དེ་དག་སོ་སོར་གཏོར། དེ་སྲུབ་བྱེད་ཀྱི་རླུང་གིས་བསྲུབས་པས་ལེགས་པར་ཆགས་སོ།  ། རླུང་དེའི་ཁ་དོག་ནི་ནོར་བུ་ཨིན་དྲ་ནི་ལའི་རྣམ་པ་ལ། དབྱིབས་ནི་རྡོ་རྗེ་རྒྱ་གྲམ་མུ་འཁྱུད་ཟླུམ་པོས་བསྐོར་བ་ལྟ་བུ། ཚད་ནི་རྔམས་སུ་དཔག་ཚད་ས་ཡ་དྲུག་འབུམ་དང་རྒྱར་ནི་གྲངས་མེད་པ་ཡོད་ལ། བྱེད་ལས་སྲ་ཞིང་མཁྲེགས་པ་དེས་ཆུ་ལ་སོགས་པ་བརྟེན་པའི་བྱ་བ་བྱེད་དོ།  ། དེའི་སྟེང་དུ་ཆུའི་དཀྱིལ་འཁོར་ཆགས་ཏེ། དེ་ཡང་རླུང་གི་དཀྱིལ་འཁོར་གྱི་སྟེང་གི་ནམ་མཁའ་ལ་སྤྲིན་གསེར་གྱི་སྙིང་ཅན་འདུས་པ་ལས། ཆར་གྱི་རྒྱུན་ཤིང་རྟའི་སྲོག་ཤིང་ཙམ་བབས་ཏེ་འཁྱིལ་བ་ལས་ཞི་བ་གསལ་དག་གི་ཆུ་ཞེས་བྱ་བ་དབྱིབས་ཟླུམ་པོ་ཟླ་བ་རྒྱས་པ་ལྟ་བུར་ཆགས། ཆུའི་དཀྱིལ་འཁོར་དེའི་ཚད་ནི་རྔམས་སུ་དཔག་ཚད་འབུམ་ཕྲག་དང་ཉི་ཁྲི་རྒྱར་ནི་གྲངས་མེད་པ་ཡོད། དེའི་སྟེང་དུ་གསེར་གྱི་ས་གཞི་ཆགས་ཏེ། དེ་ཡང་ཆུའི་འོག་རླུང་གི་དཀྱིལ་འཁོར་ལས་སྲུབ་བྱེད་ཀྱི་རླུང་ཞེས་བྱ་བ་བྱུང་སྟེ། ཆུའི་དཀྱིལ་འཁོར་བསྲུབས་པའི་སྤྲིས་མ་ལས་གསེར་གྱི་ས་གཞི་མཚོ་ལ་དར་ཆགས་པ་ལྟར་གྲུབ་སྟེ་དབྱིབས་གྲུ་བཞི་ཁ་དོག་སེར་པོ་གསེར་ལྟ་བུར་གྱུར་ཏོ།  ། དེའི་རྔམས་སུ་ནི་དཔག་ཚད་འབུམ་ཕྲག་བཅུ་གཉིས་དང་ཉི་ཁྲི་རྒྱར་ནི་གྲངས་མེད་དོ།  ། དེའི་སྟེང་རི་མཚོ་གླིང་རྣམས་ཆགས་ཏེ། དེ་ཡང་གསེར་གྱི་ས་གཞིའི་སྟེང་དུ་ནམ་མཁའ་ལ་ཁམས་སྣ་ཚོགས་པ་ཅན་གྱི་སྤྲིན་འཁྲིགས་ཤིང་། དེ་ལས་ཆུའི་རྒྱུན་ཡུན་རིང་དུ་བབས་པ་ལས་སྨིན་པར་བྱེད་པའི་རླུང་གིས་ཆུ་དང་སའི་དཀྱིལ་འཁོར་བསྲུབས་པས་ཁམས་རབ་འབྱེད་སྡུད་ཀྱི་རླུང་ལས་རི་རབ་ལྷུན་པོ་བྱེ་བ་ཕྲག་བརྒྱ་གྲུབ། ཁམས་འབྲིང་འབྱེད་སྡུད་ཀྱི་རླུང་ལས་གསེར་གྱི་རི་བདུན་བྱེ་བ་ཕྲག་བརྒྱ་གྲུབ། ཁམས་ཐ་མ་འབྱེད་སྡུད་ཀྱི་རླུང་ལས་ཕྱི་རོལ་གྱི་ཁོར་ཡུག་ལྕགས་རི་དང་གླིང་བཞི་གླིང་ཕྲན་བྱེ་བ་ཕྲག་བརྒྱ་གྲུབ་པའི་ཚུལ་རྣམས་མདོ་སྡེ་ནས་གསུངས་པས། དེ་ལྟར་ཁམས་ཐ་མས་གླིང་བཞི་གླིང་ཕྲན་གྲུབ་སྐབས། ལྷོ་འཛམ་བུ་གླིང་གི་ལྟེ་བ་ཆུ་བོ་བཞི་འདུས་ཀྱི་མགོ་བོ་རི་བོ་ཆེན་པོ་ཏི་སེ་འདི་ཡང་གྲུབ་པ་ཡིན་པར་ཤེས་པར་བྱའོ།།